ભારતીય ટીમમાં 4 વર્ષ બાદ વાપસી કરશે આ દિગ્ગજ બોલર? સહેવાગે કહ્યું- બુમરાહ સાથે બને જોડી

IPL 2026: T20 ફોર્મેટ હંમેશાથી યુવા ખેલાડીઓની રમત માનવામાં આવે છે, પરંતુ IPL 2026માં એક 36 વર્ષીય ભારતીય ખેલાડી પોતાના પ્રદર્શનથી સૌને આંચકો આપી રહ્યો છે. આ ખેલાડીનું નામ છે ભુવનેશ્વર કુમાર. ભુવનેશ્વર કુમાર માટે આઈપીએલની આ સિઝન અત્યાર સુધી ધમાકેદાર રહી છે. તેઓ પર્પલ કેપની રેસમાં સૌથી આગળ ચાલી રહ્યા છે, પરંતુ મહત્ત્વની વાત એ છે કે તેઓ છેલ્લા 4 વર્ષથી ભારતીય ક્રિકેટ ટીમનો ભાગ નથી.

સહેવાગે ભુવનેશ્વર કુમાર માટે ઉઠાવ્યો અવાજ

ભારતના પૂર્વ સલામી બેટ્સમેન અને ક્રિકેટ નિષ્ણાંત વીરેન્દ્ર સહેવાગે પસંદગીકારોને સીધી અપીલ કરી છે કે ભુવનેશ્વર કુમારને ફરીથી ટીમ ઈન્ડિયામાં તક આપવી જોઈએ. IPL 2026માં ભુવનેશ્વરના શાનદાર ફોર્મને જોઈને સહેવાગે તેમને 'વિન્ટેજ ભુવી' ગણાવ્યા.

ક્રિકબઝ સાથેની એક ખાસ વાતચીત દરમિયાન સહેવાગે જણાવ્યું, "ભુવનેશ્વર કુમાર અદ્ભુત બોલિંગ કરી રહ્યા છે. દરેક મેચમાં તેઓ બે-ત્રણ વિકેટ લઈ રહ્યા છે. આજે પણ એમણે ત્રણ વિકેટ ખેરવી. ક્યારેક મને થાય છે કે જો તેમની ઉંમર 35 કે 36 વર્ષ છે, તો શો ફરક પડે છે? જો તેઓ આટલી સારી બોલિંગ કરી રહ્યા છે, તો T20 ક્રિકેટમાં તેમની વાપસી માટે ચોક્કસ તક આપવી જોઈએ. પસંદગીકારોએ આ અંગે ગંભીરતાથી વિચાર કરવો જોઈએ."

બુમરાહ અને ભુવીની જોડી ફરી મચાવી શકે છે ધમાલ

સહેવાગે પોતાની વાતને આગળ વધારતા કહ્યું, "જસપ્રીત બુમરાહ અને ભુવનેશ્વર કુમારની જોડી ફરી એકવાર મજબૂત પુરવાર થઈ શકે છે. ભુવનેશ્વર નવા અને જૂના બંને બોલથી અસરકારક છે. તેમની બોલિંગ જોવાની મજા આવે છે કારણ કે તેમાં જૂના ભુવનેશ્વર કુમારની ઝલક જોવા મળે છે. તેઓ કોઈ એક-બે ટીમ સામે નહીં, પરંતુ ટોચના બેટ્સમેનો વિરુદ્ધ ઘાતક બની રહ્યા છે."

નોંધનીય છે કે તાજેતરની એક મેચમાં દિલ્હી સામે ભુવનેશ્વરે માત્ર 3 ઓવરમાં 5 રન આપીને 3 વિકેટ ખેરવી નાખી હતી.

પર્પલ કેપની રેસમાં સૌથી આગળ

ભારતીય ટીમમાંથી બહાર હોવા છતાં ભુવનેશ્વર કુમારનું પ્રદર્શન ધ્યાન ખેંચનારું છે. તેઓ આ સિઝનમાં પર્પલ કેપની રેસમાં ટોચ પર છે. હાલના આંકડા કંઈક આ પ્રમાણે છે.